মহাকাশত ট্রেফিক জাম। এক নতুন দুশ্চিন্তাৰ জন্ম। দুর্বিষহ ট্রেফিক জামৰ কৰাল গ্ৰাসত মহাকাশ। এতিয়া যেন মহাকাশতো প্ৰয়োজন হৈ পৰিছে ৰঙা নীলা ট্ৰেফিক লাইট। কোনো মহাকাশ যান প্ৰক্ষেপণৰ আগত এতিয়া নাছা, ইছৰো, ই.এছ.এ আদি মহাকাশ গৱেষণা সংস্থাবোৰে ট্ৰেফিক নিয়ম মানি নচলিলে যিকোনো মূহুৰ্ততে মহাকাশত সংঘটিত হ'ব পাৰে এক ভয়ানক মুখা মুখি সংঘৰ্ষ! বিভিন্ন দেশে মহাকাশলৈ প্ৰেৰণ কৰা মহাকাশ যানবোৰে মহাকাশত ইতিমধ্যে সৃষ্টি কৰিছে জটিল যান জট। বিজ্ঞানী সকলৰ মতে প্রতি দুবছৰত একোটিকৈ ভয়ংকৰ দুর্ঘটনাত পতিত হ'ব পাৰে মহাকাশ যানবোৰ। ভাঙি চুৰমাৰ হৈ যোৱা মহাকাশ যানৰ ধ্বংসাৱশেষ বোৰৰ বৃষ্টিপাত হ'ব পাৰে আমাৰ পৃথিৱীত!
যোৱা ২৭ নৱেম্বৰ,২০২০ৰ দিনা মহাকাশত তেনে এক ভয়ংকৰ দুৰ্ঘটনাই হ'বলৈ ওলাইছিল। বিগত ২০১৮ চনৰ ১২ জানুৱাৰীত ইছৰোৱে শ্ৰীহৰিকোটাৰ পৰা পুৱা ৯ বাজি ২৮ মিনিটত PSLV-C40 উৎক্ষেপন যানেৰে কক্ষপথত স্থাপন কৰা ভাৰতৰ ৭১০ কেজি ওজনৰ Cartosat-2F নামৰ কৃত্ৰিম উপগ্ৰহটোৰ লগত ৰাছিয়াৰ ২০১২ চনত উৎক্ষেপিত Kanopus-V নামৰ ৪৫০ কেজি ওজনৰ কৃত্ৰিম উপগ্ৰহটোৰ পৃথিৱীৰ পৰা ৫১০ কিমি উচ্চতাৰ কক্ষপথত মুখামুখি সংঘৰ্ষ হ'বলৈ ওলাইছিল। কক্ষপথেৰে অতিক্ৰম কৰাৰ সময়ত এই দুই কৃত্ৰিম উপগ্ৰহৰ মাজৰ দুৰত্ব আছিল মাত্ৰ ২২০ মিটাৰ!
বৰ্তমান মহাকাশত বিভিন্ন দেশে প্ৰক্ষেপন কৰা কৃত্ৰিম উপগ্ৰহৰ সংখ্যা দিনক দিনে বাঢ়ি আহিছে। সেইবাবে উপগ্রহবোৰৰ মাজৰ কক্ষপথৰ দূৰত্বও কমি আহিছে। পৃথিৱীৰ পৰা ৪০০ - ৫০০ কিমি উচ্চতাত হেজাৰৰো অধিক কৃত্ৰিম উপগ্ৰহৰ কক্ষপথ স্থাপন হোৱাৰ ফলতেই মহাকাশত এনে মহাকাশ যান জট সৃষ্টি হৈছে। ইতিমধ্যে বিগত ২০০৯ চনত মহাকাশৰ বুকুত এটা দূর্ঘটনা সংঘটিত হৈছিল য'ত এটা মার্কিন কৃত্ৰিম উপগ্ৰহ আৰু এটা ৰাছিয়াৰ উপগ্ৰহৰ মাজত সংঘৰ্ষ হোৱাৰ ফলত দুয়োটা উপগ্ৰহই চূৰ্ণ বিচূৰ্ণ হৈ ছাইবেৰিয়াৰ বিস্তৃত অঞ্চলত টুকুৰা টুকুৰে সৰি পৰিছিল।
মহাকাশত দুটা কৃত্ৰিম উপগ্ৰহৰ মাজৰ দূৰত্ব অতি কমেও এক কিলোমিটাৰ হোৱা উচিত। কিন্তু বিভিন্ন দেশে এই দূৰত্ব ৫০০ মিটাৰ বুলি উপগ্ৰহ প্ৰক্ষেপন কৰিবলৈ লোৱাত সমস্যাৰ সৃষ্টি হৈছে। বৰ্তমান মহাকাশত বিভিন্ন দেশৰ কাৰ্যক্ষম ২০০০টা মান উপগ্রহ আছে। নিয়ন্ত্ৰণহীন আৰু মৃত উপগ্ৰহৰ সংখ্যাবোৰ যোগ কৰিলে এই সংখ্যা ৫০০০ অতিক্ৰম কৰিব। তেনে ক্ষেত্ৰত অনাগত দিনবোৰত এই দূৰত্ব কেনেদৰে বৰ্তাই ৰখা সম্ভৱ - এইটো এটা গুৰুত্বপূৰ্ণ বিষয়। জানিব পৰা মতে বিগত ২৭ নৱেম্বৰৰ সাম্ভাব্য দূৰ্ঘটনাটোৰ পিছত বিশ্বৰ অগ্ৰণী দেশবোৰৰ মহাকাশ বিজ্ঞানীসকল ২০২০ চনৰ ডিচেম্বৰ মাহত মিলিত হৈ কৃত্ৰিম উপগ্ৰহৰ কক্ষপথ সম্পৰ্কে পর্যালোচনা কৰি এটি সমাধান উলিয়াবলৈ যত্নপৰ হ'ব।
No comments:
Post a Comment