মহাকাশযান চেলেঞ্জাৰ উৎক্ষেপণৰ সেই অভিশপ্ত দিনটো

1986 চনৰ 28 জানুৱাৰীৰ এটি ফৰকাল ৰাতিপুৱা। স্থান: ফ্লোৰিডা, আমেৰিকা। সময়: ৰাতিপুৱা 11:39:13 (স্থানীয়)। নাছাৰ বিজ্ঞানী সকল ব্যস্ত মহাকাশ যান "চেলেঞ্জাৰ"ৰ উৎক্ষেপণৰ বাবে। আটলাণ্টিক মহাসাগৰৰ উপকুলীয় অঞ্চলটো বিশেষজ্ঞ বিজ্ঞানীৰে গিজগিজাই আছে। মহাকাশ যানখনৰ অন্তিম মূহুৰ্তৰ পৰীক্ষাবোৰ ইতিমধ্যে সম্পন্ন হৈ গৈছে। নাছাৰ এখন বিশেষ বাহনত উৎক্ষেপণ কেন্দ্ৰলৈ আহি পাইছেহি সাত জন মহাকাশচাৰী। কমাণ্ডাৰ ফ্ৰেন্সিচ কোবে, পাইলট মাইকেল স্মিথ, তিনি মিচন স্পেচিয়েলিষ্ট ৰোণাল্ড মেকনেয়াৰ, এলিচন ওনিজুকা, জুদিথ ৰেচনিক, দুই পেল'ড বিশেষজ্ঞ গ্ৰেৰী জাৰ্ভিচ আৰু ক্ৰিষ্টা মেকঅলিফি। বিশেষজ্ঞ বিজ্ঞানী, পৰিয়ালৰ সদস্য আৰু নিৰ্দিষ্ট সংখ্যক অতিথিৰ উপস্থিতিত সকলোৰে শুভেচ্ছা গ্ৰহণ কৰি মহাকাশচাৰী সকল STS-51-L মিচন সম্পাদনৰ বাবে মহাকাশ যানখনৰ ক্ৰিউ কেবিনত সোমাল। নিয়ন্ত্ৰণ কক্ষৰ সেউজ সংকেত পোৱাৰ লগে লগে আৰম্ভ হ'ল কাউণ্ট ডাউন: 5 4 3 2 1 0....। লগে লগে এটি মৃদু গোজৰণি মাৰি চেলেঞ্জাৰৰ ফুৱেল টেংকৰ ইন্ধন জ্বলি উঠিল। সুমথিৰা ৰঙৰ ধোঁৱাই মূহুৰ্ততে আৱৰি ধৰিলে উৎক্ষেপণ কেন্দ্ৰৰ চৌহদ। কেইটামান মূহুৰ্তৰ ভিতৰতে উৎক্ষেপণ যান চেলেঞ্জাৰ মহাকাশৰ বুকুলৈ ধাৱমান হ'ল। হৰ্ষোল্লাস আৰু হাত চাপৰিৰে সকলোৱে চেলেঞ্জাৰক শুভকামনা যাচিলে। উৎক্ষেপণৰ পিছ মূহুৰ্তৰ পৰাই চেলেঞ্জাৰে গতিবেগ বৃদ্ধি কৰি 60 ছেকেণ্ডৰ ভিতৰত প্ৰায় প্ৰতি ছেকেণ্ডত 4 কিমি গতিবেগ পাইছিল। সকলো থিকেই আছিল। কিন্তু উৎক্ষেপণৰ 62 ছেকেণ্ড পিছত নিয়ন্ত্ৰণ কক্ষৰ ডিজিটেল পৰ্দাত ধৰা পৰে এক ভয়ংকৰ দৃশ্য। যানখনৰ সোঁফালৰ Solid Rocket Booster (SRB) নামৰ বিশেষ অংশটোৱে যে কাম কৰা নাই ! এই solid rocket boosterত এটা O-ring থাকে আৰু এই অংশটো মহাকাশ যানখনৰ এটা অতি গুৰুত্বপূৰ্ণ অংশ। নিয়ন্ত্ৰণ কক্ষৰ বিজ্ঞানী সকলৰ বুকু এক অজান আশংকাত কঁপি উঠিল। ইতিমধ্যে solid rocket booster নামৰ অংশটোৱে কাম নকৰা বাবে যানখনে পৃথিৱীৰ বায়ুমণ্ডলত হোৱা ঘৰ্ষণত নিয়ন্ত্ৰণ হেৰুৱাই পেলাইছিল, আৰু মহাকাশৰ বুকুত উৰি আছিল থিক যেন এক উদ্দেশ্যবিহীন ভাবে উৰুৱাই দিয়া দীপাৱলীৰ এটা জলন্ত ৰকেট হে ! বিজ্ঞানী সকলৰ হাতত এতিয়া আৰু কৰিব পৰা একোৱেই নাই। বিসংগতি ধৰা পৰাৰ মাত্ৰ 11 ছেকেণ্ড পিছত অৰ্থাৎ উৎক্ষেপণৰ মাত্ৰ 73 ছেকেণ্ড পিছতেই এক প্ৰচণ্ড বিস্ফোৰণত টুকুৰা টুকুৰ হৈ গ'ল চেলেঞ্জাৰ মহাকাশযানখন। জলন্ত অগ্নিপিণ্ড, ছাঁই আৰু ধাতবীয় টুকুৰা সিঁচৰতি হৈ পৰিল আটলাণ্টিকৰ বুকুত। মাত্ৰ 73 ছেকেণ্ডত হেৰাই গ'ল সাত জন মহাকাশ বিজ্ঞানী। সেই অভিশপ্ত ঘটনা সংঘটিত হোৱা আজি 30 বছৰ পূৰ্ণ হ'ল। বিজ্ঞানী কেইজনৰ ত্ৰিশ বছৰীয়া মৃত্যু তিথিত শ্ৰদ্ধাৰে সুঁৱৰিছো।