মৃতপ্ৰায় নক্ষত্ৰৰ বুকুত জাহ যোৱা গ্ৰহটো

মৃতপ্ৰায় তৰা এটাই ইয়াৰ চৌদিশে অহৰহ পৰিভ্ৰমণ কৰি থকা গ্ৰহ এটা ক্ৰমে গিলি পেলাইছে। মেছাচুচেটছ ইনষ্টিটিউট অৱ টেকন’লজি, হাৰ্ভাৰ্ড ইউনিভাৰ্চিটি আৰু কেলিফৰ্নিয়া ইনষ্টিটিউট অৱ টেকন’লজিৰ মহাকাশ বিজ্ঞানীৰ এটা দলে প্ৰথমবাৰৰ বাবে এনে এক বিৰল পৰিঘটনা পৰ্যবেক্ষণ কৰিছে। পৃথিৱীৰ পৰা প্ৰায় ১২ হাজাৰ আলোকবৰ্ষ দূৰত্বত অৱস্থিত একুইলা নক্ষত্ৰমণ্ডলত এই ঘটনা সংঘটিত হৈছে। এই গ্ৰহটো আমাৰ সৌৰজগতৰ বৃহস্পতি গ্ৰহৰ আকাৰৰ সমান।

প্ৰায় ১০ বিলিয়ন বা ১০০০ কৌটি বছৰীয়া ZTF SLRN-2020 নামৰ এই তৰাটো আমাৰ হাতীপটি তাৰকাৰাজ্যৰ একুইলা নক্ষত্ৰমণ্ডলত অৱস্থিত। মৃতপ্ৰায় এই তৰাটোৰ উজ্বলতা ইতিমধ্যে স্তিমিত হৈ পৰিছিল যদিও তৰাটোৱে গ্ৰহটো গিলিবলৈ আৰম্ভ কৰাৰ লগে লগে ই নিজৰ স্বাভাৱিক স্তৰৰ উজ্বলতাতকৈ প্ৰায় ১০০ গুণ অধিক উজ্জ্বল হৈ পৰাত জ্যোতিৰ্বিজ্ঞানীৰ দলটোৱে এই বিশেষ পৰিঘটনাটো পৰ্যবেক্ষণ কৰাৰ সুবিধা লাভ কৰে।

সাধাৰণতে তৰা এটাৰ ইন্ধন যেতিয়া শেষ হয়, তেতিয়া তৰাটোৰ কেন্দ্ৰত নিউক্লীয় সংযোজন বিক্ৰিয়া বন্ধ হৈ যায়। ফলস্বৰূপে তৰাটো ধীৰে ধীৰে ইয়াৰ স্বাভাৱিক আকাৰতকৈ বহু গুণে ডাঙৰ হৈ চৌদিশে প্ৰসাৰিত হ'বলৈ ধৰে। ইয়াৰ ফলত তৰাটোৰ সন্মুখলৈ যি বস্তুৱেই আহে, সেই সকলোবোৰ  বস্তুকেই তৰাটোৱে গিলি পেলায়। 

ভৱিষ্যতে আমাৰ সূৰুযেও সৌৰজগতৰ গ্ৰহবোৰ থিক এনেদৰেই গিলি পেলাব। এই বিৰল পৰিঘটনাটোৱে প্ৰত্যক্ষ ভাবে আমাৰ পৃথিৱীখনৰ ভৱিষ্যতৰ কথাও সোঁৱৰাই দিলে। আগন্তুক ৫ বিলিয়ন বছৰৰ পাছত সূৰ্য্যৰ জীৱন কাল অন্ত পৰিব। সেই সময়ত বিজ্ঞানীসকলৰ মতে আমাৰ সূৰ্যটোও আকাৰত ওফন্দি উঠিব আৰু সৌৰজগতৰ শিলাময় গ্ৰহবোৰ একাদিক্ৰমে গিলি পেলাবলৈ আৰম্ভ কৰিব। বুধ আৰু শুক্ৰ গ্ৰহক ভক্ষণ কৰাৰ পিছত আমাৰ এই ধুনীয়া পৃথিৱীখনো মৃতপ্ৰায় সূৰ্যৰ বুকুত ভষ্মীভূত হৈ  মহাবিশ্বৰ মানচিত্ৰৰ পৰা হেৰাই যাব।