চন্দ্ৰযান-৩ : পুনৰ জোনবাইৰ দেশলৈ

সকলো ঠিক থাকিলে অহা ১২ জুলাই, ২০২৩ তাৰিখে জোনবাইৰ বুকুলৈ উৰা মাৰিব ভাৰতৰ চন্দ্ৰযান-৩। ভাৰতীয় মহাকাশ গৱেষণা সংস্থা "ইছৰো"ৰ বিজ্ঞানীসকল সম্প্ৰতি এই অভিযানৰ বাবে প্ৰস্তুত কৰি তোলা "লেণ্ডাৰ"খন মূল মহাকাশ যানখনৰ সৈতে একত্ৰিত কৰাৰ কামত ব্যস্ত। ইছৰোৰ অভিযানত ভাৰতৰ আটাইতকৈ গধুৰ ৰকেট, জিঅ’চিনক্ৰ’নাছ লঞ্চ ভেহিকেল মাৰ্ক-৩ (GSLV Mark-3) নামৰ উৎক্ষেপক যানখনে ভাৰতৰ কৌটি কৌটি জনতাৰ হেপাহৰ চন্দ্ৰযান-৩ক জোনবাইৰ বুকুলৈ কঢ়িয়াই নিব।

চাৰি বছৰ পূৰ্বে ইছৰোৰ বিজ্ঞানীসকলে চন্দ্ৰ অভিযানৰ চেষ্টা কৰিছিল। সেই উদ্দেশ্যে চন্দ্ৰযান-২ জোনবাইৰ বুকুত অৱতৰণ কৰোৱাৰ উদ্দেশ্যৰে প্ৰেৰণ কৰা হৈছিল। সেই মহাকাশযানখনত আছিল এখন লেণ্ডাৰ আৰু এখন ৰ'ভাৰ। লেণ্ডাৰখনৰ নাম আছিল বিক্ৰম। প্ৰজ্ঞান নামেৰে পৰিচিত আছিল ৰ'ভাৰখন। চন্দ্ৰযান-২ক জোনবাইৰ দক্ষিণ মেৰুত অৱতৰণ কৰোৱাৰ কথা আছিল। পৰিকল্পনা আছিল - অৱতৰণ কৰাৰ থিক পিছতেই বিক্ৰম লেণ্ডাৰখন চন্দ্ৰযান-২ৰ পৰা ওলাই আহিব আৰু প্ৰজ্ঞান ৰ'ভাৰখন জোনবাইৰ বুকুলৈ নমাই আনিব। 

কিন্তু, ২০১৯ চনত ইছৰোৰ বিজ্ঞানীসকলৰ এই চন্দ্ৰ অভিযান অভিযান ব্যৰ্থ হয়। লেণ্ডিঙৰ সময়ত চন্দ্ৰযান-২ৰ সৈতে বিজ্ঞানীসকলৰ যোগাযোগ হেৰাই যায়, যাৰ ফলত বিক্ৰম লেণ্ডাৰখন অনিয়ন্ত্ৰিত হৈ জোনবাইৰ বুকুত সজোৰে থেকেচা খাই পৰে। কিন্তু এইবাৰ ভাৰতীয় মহাকাশ গৱেষণা সংস্থাটোৱে ২০১৯ চনৰ ভুলটোৰ পুনৰাবৃত্তি কৰিব নিবিচাৰে। তাৰবাবে চন্দ্ৰযান-৩ৰ অৱতৰণ কৰিবলগীয়া স্থান চন্দ্ৰযান-২ৰ অৱতৰণ স্থানৰ পৰা কিছু দূৰত নিৰ্ধাৰণ কৰা হৈছে। ইয়াৰ উপৰিও লেণ্ডাৰ আৰু ৰ'ভাৰৰ অৱতৰণৰ সময়ত অতিৰিক্ত সাৱধানতা অৱলম্বন কৰাৰ ব্যৱস্থাও গ্ৰহন কৰা হৈছে।

ইছৰোৰ দ্বাৰা সৃষ্ট চন্দ্ৰযান-৩ দৰাচলতে এটা থলুৱা লেণ্ডাৰ মডিউল (এল.এম), এটা প্ৰপালচন মডিউল (পি.এম) আৰু এখন ৰ'ভাৰৰ সংমিশ্ৰণ যাৰ মূল লক্ষ্য হৈছে আন্তঃগ্ৰহ অভিযানৰ বাবে প্ৰয়োজনীয় নতুন প্ৰযুক্তি বিকশিত কৰা। ইছৰোৰ মুৰব্বী ড° এছ সোমনাথৰ মতে চন্দ্ৰযান-৩ৰ লেণ্ডাৰে চন্দ্ৰৰ মাটিত সফলতাৰে "লেণ্ডিং" কৰাৰ পিছত ৰ'ভাৰখন জোনবাইৰ মাটিত এলানি ৰাসায়নিক পৰীক্ষা কৰিব। ইতিমধ্যে ইছৰোৰ বিজ্ঞানীসকলে লেণ্ডাৰ আৰু ৰ'ভাৰত প্ৰয়োজনীয় ‘পেলোড’ স্থাপন কৰাৰ কাম সম্পন্ন কৰি এই পেলোডসমূহ বাংগালুৰুৰ ইউ.আৰ.ৰাও চেটেলাইট চেণ্টাৰলৈ অনা হৈছে। শ্ৰীহৰিকোটাৰ সতীশ ধৱন মহাকাশ কেন্দ্ৰত ইতিমধ্যে প্ৰস্তুত হৈ উঠিছে GSLV Mark-3 নামৰ উৎক্ষেপক যানখন। আৰু কেইদিনমান পিছতেই এই মহাকাশ যানখন চন্দ্ৰযান-৩ক বুকুত বান্ধি লৈ উৰা মাৰিব জোনবাইৰ দেশলৈ। 

আশাকৰো ইছৰোৰ দ্বাৰা জোনবাইত অৱতৰণৰ এই দ্বিতীয় প্ৰচেষ্টা সফল হ'ব আৰু ইতিহাসৰ পৃষ্ঠাত জোনবাইত সফল অৱতৰণ কৰা বিশ্বৰ চতুৰ্থখন দেশ হিচাবে ভাৰত আৰু সমূহ ভাৰতীয়ক আকৌ এবাৰ গৌৰৱাম্বিত কৰিব।