২০২৫ চনৰ ভিতৰত ভাৰতে মানুহক মহাকাশলৈ প্ৰেৰণ কৰাৰ দিশত ইছৰোৰ এই পৰীক্ষামূলক প্ৰক্ষেপণ এক গুৰুত্বপূৰ্ণ পদক্ষেপ হিচাপে বিবেচিত হৈছে। গগনযানৰ TV-D-1 নামৰ এই অভিযানৰ মূল উদ্দেশ্য আছিল লঞ্চ ভেহিক'ল, ক্ৰু-এস্কেপ আৰু ক্ৰু মডিউলৰ কাৰ্যকাৰিতা পৰীক্ষা কৰা। কাৰিকৰী বিসংগতিৰ বাবে পুৱা ৮ বজাত উৎক্ষেপণ হ'ব লগীয়া এই পৰীক্ষামূলক প্ৰক্ষেপন ইছৰোৱে দুঘণ্টা পলমকৈ সফলতাৰে উৎক্ষেপণ কৰি ভাৰতীয় মহাকাশ বিজ্ঞানক আৰু এঢাপ আগুৱাই লৈ গ'ল। উৰণৰ মাত্ৰ ৯ মিনিটৰ পিছতেই গগনযানৰ ক্ৰু-মডিউলে সফলতাৰে শ্ৰীহৰিকোটাৰ পৰা আঁতৰৰ বঙ্গোপসাগৰৰ মাজত সফলতাৰে অবতৰণ কৰে। তাৰপৰা ভাৰতীয় নৌসেনাৰ জোৱান সকলে গগনযানৰ ক্ৰু-মডিউলটো সংগ্ৰহ কৰি মাদ্রাজ (চেন্নাই)ৰ বন্দৰলৈ অনাৰ প্ৰস্তুতি চলাইছে।
ইছৰোৰ বিজ্ঞানীসকলে কয় যে মহাকাশত উৎপন্ন হোৱা যিকোনো জৰুৰীকালীন পৰিস্থিতিত দেশীয় ভাবে তৈয়াৰ কৰা এই উন্নত প্ৰযুক্তিয়ে মহাকাশচাৰীসকলৰ জীৱন ৰক্ষা কৰিব পাৰিব। এই প্ৰণালীত, মহাকাশচাৰীসকল ৰকেটৰ সৈতে সংযোজিত এটা বিশেষ মডিউলৰ ভিতৰত থাকিব। যদিহে ৰকেটত কোনো বিসংগতিয়ে দেখা দিয়ে, মডিউলৰ লগত সংলগ্ন কম্পিউটাৰৰ মনিটৰত ইয়াৰ তথ্য প্ৰকাশ হ'ব আৰু মহাকাশচাৰীসকলে তৎক্ষণাৎ এই মডিউলটো মূল মহাকাশযানখনৰ পৰা পৃথক কৰি সুৰক্ষিতভাৱে পৃথিৱীত অৱতৰণ কৰিব পাৰিব। পৰীক্ষাৰ সময়ত এইটোও নিৰীক্ষণ কৰা হৈছিল যাতে এই প্ৰযুক্তিয়ে পৃথিৱীৰ বায়ুমণ্ডলৰ ভিতৰৰ যিকোনো উচ্চতাত এই "ক্ৰু এস্কেপ চিষ্টেম"টোৱে নিখুঁতভাৱে কাম কৰিব পাৰে।
গগনযানৰ এই যাত্ৰা তিনিটা পৰ্যায়ত সম্পন্ন হ’ব। ইয়াৰ প্ৰথম দুটা মানৱবিহীন আৰু অন্তিমটো মিছন ভাৰতীয় মহাকাশচাৰীৰ মহাকাশত পদাৰ্পন। ২০২৫ চনৰ এই বিশেষ অভিযানটো মহাকাশ বিজ্ঞানৰ ইতিহাসত এক মাইলৰ খুঁটি হ’ব। ভাৰতীয় মহাকাশ গৱেষণা সংস্থাই (ISRO) পৃথিৱীৰ সৰ্বনিম্ন কক্ষপথত এটা মহাকাশ কেন্দ্ৰ নিৰ্মাণৰ পৰিকল্পনা কৰিছে আৰু তাৰবাবে যাৱতীয় কাম কাজো আৰম্ভ কৰিছে। আন্তঃৰাষ্ট্ৰীয় মহাকাশ কেন্দ্ৰৰ দৰে ভাৰতৰো মহাকাশত নিজাকৈ এটা মহাকাশ কেন্দ্ৰ থাকিব। ইছৰোৰ বিজ্ঞানীসকলৰ এই প্ৰচেষ্টা সফল হওঁক।
No comments:
Post a Comment