ভাৰতীয় মহাকাশ ষ্টেচন

২০১৯ চনত, ভাৰতীয় মহাকাশ গৱেষণা সংস্থা (ইছৰো)ৰ মুৰব্বী কে. সিভানে এখন ছেমিনাৰত প্ৰথমবাৰৰ বাবে ভাৰতৰ এটা  নিজস্ব মহাকাশ ষ্টেচনৰ বিষয়টো উপস্থাপন কৰিছিল। তাৰবাবে তেখেতে এই পৰিকল্পনাৰ অংশ হিচাবে প্ৰায় ২০ টন ভৰ বিশিষ্ট এটা মডেলৰ আভাষো যুগুত কৰি আনিছিল। তাৰ তিনি বছৰ পিছত, অৰ্থাৎ ২০২৩ চনৰ ১ জানুৱাৰীৰ দিনা ইছৰোৰ অধ্যক্ষ হিচাপে অৱসৰ লোৱাৰ পূৰ্বে ইছৰোৰ পৰম্পৰাগত "নৱবৰ্ষৰ ভাষণ" অনুষ্ঠানত কে. সিভানে ভাৰতৰ প্ৰথমটো মানৱ যুক্ত মহাকাশযান "গগনযান"ৰ পৰিকল্পনা অনুযায়ী প্ৰয়োজনীয় প্ৰাথমিক পৰীক্ষালানিৰ সফল সমাপ্তিৰ ঘোষণাৰে সমগ্ৰ বিশ্ববাসীলৈ তেওঁ ভাৰতৰ মহাকাশ গৱেষণা সংস্থাটোৱে মহাকাশ বিজ্ঞানৰ ক্ষেত্ৰখনত লাভ কৰা ঈৰ্ষণীয় সফলতাৰ বাৰ্তা প্ৰেৰন কৰিছিল।

কে. সিভানৰ অৱসৰৰ পিছত ২০২৩ চনত ইছৰোৰ নৱনিযুক্ত অধ্যক্ষ এছ. সোমানাথে কৈছিল যে ইতিমধ্যে ইছৰোৰ গগনযান কাৰ্যসূচীৰ জৰিয়তে ভাৰতীয় মহাকাশচাৰীক সম্পূৰ্ণ দেশীয় প্ৰযুক্তিৰে মহাকাশলৈ প্ৰেৰন কৰিবলৈ "স্পেচ ফ্লাইট"ৰ কাম কাজবোৰ অন্তিম পৰ্যায়ত উপনীত হৈছে আৰু ইয়াৰ পিছতেই পৰৱৰ্তী মডিউলসমূহত ভাৰতৰ নিজস্ব "স্পেচ ষ্টেচন" নিৰ্মাণৰ প্ৰক্ৰিয়াটো তৰান্বিত কৰা হ'ব। 

প্ৰস্তাৱিত এই মহাকাশ ষ্টেচন প্ৰকল্পৰ সময়সীমা ব্যাপক। আগন্তুক ২০ বছৰৰ ভিতৰত ভাৰতৰ নিজস্ব মহাকাশ ষ্টেচন নিৰ্মাণ সম্পূৰ্ণ কৰাৰ পৰিকল্পনাক ইতিমধ্যে কেন্দ্ৰীয় চৰকাৰে অনুমোদন কৰিছে। ২০২৫ চনৰ পৰা ভাৰতীয় মহাকাশ ষ্টেচনৰ বাবে উন্নয়নমূলক পৰীক্ষাবোৰ আৰম্ভ হ’ব আৰু ২০৩৫ চনৰ ভিতৰত ভাৰতীয় মহাকাশ ষ্টেচন প্ৰকল্পটোৰ চূড়ান্ত সংস্কৰণটো নিৰ্মাণ সম্পূৰ্ণ হ'ব। অৱশ্যে ইয়াৰ পূৰ্বে অৰ্থাৎ ২০২৮ চনত ইছৰোৱে মহাকাশ ষ্টেচনৰ এটা প্ৰাথমিক মডেল স্থাপন কৰাৰ পৰিকল্পনা কৰিছে। ইয়াৰ লগে লগে ২০৪০ চনৰ ভিতৰত ইছৰোৱে  চন্দ্ৰলৈ এটা মানৱ অভিযান সম্পন্ন কৰাৰো প্ৰস্তুতি আৰম্ভ কৰিছে। এই পৰিকল্পনাৰ অংশ হিচাবে সোনকালেই মানৱহীন চন্দ্ৰযান-৪ অভিযান আৰম্ভ হ'ব, যত জোনবাইৰ বুকুৰ পৰা মাটিৰ নমুনা সংগ্ৰহ কৰি মহাকাশযান পুনৰ পৃথিৱীলৈ ঘূৰাই অনাৰ প্ৰস্তুতি চলি আছে।

তলত দিয়া ইছৰোৰ লিংকটো খুলি অধিক তথ্য চাব পাৰে 👇

https://www.isro.gov.in/