পোহৰৰ বেগত গতি কৰিলে, সকলো ঘড়ী থমকি ৰয়। শূন্য আকাৰ বা ছিঙ্গুলাৰিটিলৈ সংকুচিত হয় মহাবিশ্ব। গতিশীল ঘড়ীবোৰ স্থিৰ অৱস্থাৰ ঘড়ীবোৰৰ তুলনাত লেহেমীয়া হয়। যেতিয়া কোনো গতিশীল ঘড়ীৰ বেগ, পোহৰৰ বেগৰ প্ৰায় সমান হয়, তেতিয়া সেই ঘড়ীৰ কাটাবোৰ প্ৰায় স্তব্ধ হৈ পৰে। এইখিনিতেই আমি এটা আকৰ্ষণীয় প্ৰশ্ন উত্থাপন কৰিব পাৰোঁ - যিহেতু তীব্ৰগতি সম্পন্ন ফোটন কণাবোৰে পোহৰৰ বেগত গতি কৰে আৰু পোহৰৰ বেগেই গতিশীল সকলো বস্তুৰ বেগৰ চূড়ান্ত সীমা, তেনে ক্ষেত্ৰত পোহৰ বা পোহৰৰ ফোটন কণাবোৰৰ বাবে "সময়" বুলি কিবা এটা ভৌতিক ৰাশি থকাটো সম্ভৱ নে? পোহৰৰ বাবে সময় সদায়েই স্থবিৰ নহয়নে?
বিজ্ঞানীসকলৰ মতে পোহৰ অথবা পোহৰৰ মৌলিক কণা ফোটনবোৰৰ বাবে "সময়" আৰু "স্থান" বুলি একোৰে অস্তিত্ব নাই।
তেওঁলোকৰ মতে ইয়াৰ কাৰণ হ'ল - আইনষ্টাইনৰ আপেক্ষিকতাবাদৰ তত্ব অনুসৰি, যিবোৰ বস্তু অতি বেছি বেগেৰে গতি কৰে, তেনে বস্তুবোৰৰ ক্ষেত্ৰত "সময়" কোনো এজন স্থিৰ পৰ্য্যবেক্ষকৰ বাবে অতিমাত্ৰা ধীৰ হৈ পৰে। আনহাতে পোহৰৰ বেগত গতি কৰা কোনো বস্তুৰ বাবে, পৰ্যবেক্ষকৰ দৃষ্টিত "সময়" থমকি যায়। ইয়াৰ অৰ্থ এয়ে যে পোহৰে মুহূৰ্ত এটাৰ ভিতৰতেই যাত্ৰা সমাপন কৰে।
পোহৰৰ কোনো বিশ্ৰামৰ ফ্রেম (Rest Frame) নাই। সেয়েহে পোহৰে যিকোনো ফ্ৰেমত সৰ্বোচ্চ বেগত গতি কৰিব পাৰে। যিহেতু "সময়"ক নিৰ্দিষ্ট এক ফ্ৰেমৰ ভিতৰতহে নিৰ্ধাৰণ কৰা হয়, সেয়ে পোহৰৰ বাবে সময় তাৎপৰ্যহীন।
আন এটা উল্ল্যেখযোগ্য কাৰণ হ'ল এই যে পোহৰৰ বেগত "স্থান" সংকুচিত হয়। অৰ্থাৎ পোহৰে গতি কৰিলে, যাত্ৰা কৰা স্থানৰ মাজৰ দূৰত্ববোৰ শূন্যলৈ সংকুচিত হৈ পৰে। সেইবাবে, পোহৰ অথবা পোহৰৰ ফোটন কণাৰ দৃষ্টিকোণৰ পৰা কেৱল সময়েই নহয়, স্থানো একেবাৰে সংকুচিত হৈ এক বিন্দুত পৰিনত হয়।
সেইবাবেই বিজ্ঞানীসকলৰ মতে পোহৰে "সময়" আৰু "স্থান" দুয়োকে অনুভৱ কৰিব নোৱাৰে। পোহৰৰ সৰ্বিচ্চ বেগত "সময়" আৰু "স্থান"ৰ ধাৰণাবোৰ নিদিষ্ট নহয়।
No comments:
Post a Comment