পানীৰে আলোকিত হোৱা লেম্প বা লণ্ঠনটো

আয়েছা মিজেনো আৰু ৰাফেল মিজেনো নামৰ দুজন ভাই ককাইৰ এটা প্ৰধান সমস্যা আছিলে- ফিলিপাইনৰ বৈদ্যুতিক নাটনি। ছাত্ৰ অৱস্থাৰ পৰাই দৰিদ্ৰ পৰিয়ালৰ এই দুই ভাতৃয়ে বিদ্যুতৰ সমস্যাৰ বাবে পঢ়াশুনাত যথেষ্ট অসুবিধাৰ সন্মুখীন হৈছিল। কেৰাচিনৰ অভাবে এই সমস্যা দুগুণে বঢ়াইছিল। তেওঁলোকৰ এই সমস্যাই কিন্তু তেওঁলোকক হতাশ কৰাৰ সলনি কিবা এটা নতুনকৈ চিন্তা কৰিবলৈহে অনুপ্ৰাণিত কৰিলে। পিছলৈ এই ভাতৃদ্বয়ে সাজি উলিয়ালে পানীৰে আলোকিত হোৱা Sustainable Alternative Lighting বা SALt লেম্প। ইয়াৰ বাবে তেওঁলোকে ধাতুৰ সৰু দণ্ড বিদ্যুতদ্বাৰ আৰু লুণীয়া পানীক বিদ্যুত বিশ্লেষ্য হিচাপে লৈ পানীৰ পৰাই বিভৱ সৃষ্টি কৰি তাৰ সহায়ত LED বা Light Emitting Diodৰ পৰা পৰ্যাপ্ত পোহৰ পোৱাৰ এটি কৌশল আৱিষ্কাৰ কৰে। পিছলৈ কেইজনমান বিশেষজ্ঞ ইঞ্জিনীয়াৰৰ উদ্যোগত এই লেম্পটোৰ প্ৰয়োজনীয় সালসলনি খিনি কৰি বৰ্তমান ইয়াক ফিলিপাইনৰ বাসিন্দাসকলৰ বাবে সহজলভ্য ভাবে বজাৰত মুকলি কৰি দিয়া হৈছে। এই লেম্পটোৰ বিশেষ সুবিধাবোৰ হৈছে - ই পৰিবেশৰ বাবে ক্ষতিকাৰক নহয়, কেৰাচিনৰ অভাব দূৰ কৰে, পানীক ইন্ধন হিচাবে লোৱা বাবে কম খৰছী, সাগৰৰ লুণীয়া পানীৰে কাম চলাব পাৰি, ইয়াৰ পৰা আহৰণ কৰা বিদ্যুতৰ সহায়ত মোবাইল চাৰ্জ কৰিব পাৰি ইত্যাদি। নিসন্দেহে ই এক চমকপ্ৰদ আৱিষ্কাৰ। কম দিনৰ ভিতৰতে এই বিশেষ পানীৰে চলা লণ্ঠনটো পৃথিৱীৰ বিভিন্ন বজাৰলৈ আমদানি হ'ব।