শ্রান্ত পথৰ ক্লান্ত পথিকৰ দৰে কেতিয়াবা এৰি অহা বাটটোলৈ ঘূৰি চাও। এৰা, সময়বোৰ নীৰৱেই অতীতত পৰিণত হয়। সময়ৰ অবিশ্রান্ত ধাৰাত বিলীন হৈ যায় জীৱনৰ প্ৰতিনিয়ত মূহুৰ্তবোৰ। আমি যে জীৱনৰ এটা প্রান্তৰ পৰা অন্য এক প্রান্তলৈ ক্রমাগতভাৱে আগবাঢ়িছোঁ ধীৰে ধীৰে এক অৱধাৰিত নীতিকেই সৰোগত কৰি। এয়েইতো জীৱন……
অনাদি কালৰ পৰাই জীৱন চলমান। মোৰ গতিশীল জীৱনে যাত্ৰাপথত একাধিক কেঁকুৰিৰে বাট বুলি আহিছে। বিভিন্ন ক্ষণত জীৱনে দিছে জীৱনটোক সজাই তোলাৰ নতুন উপলব্ধি, কিছু নতুন অনুভৱ। সৃষ্টিৰ বাহকৰূপী সময়ে একেটি ধাৰাতেই চিৰকালৰ দৰেই আপোন গতিত খৰস্ৰোতা তটিনীৰ দৰেই বৈ গৈছে অহৰহ। বেগ আৰু আবেগৰ যুদ্ধত কেতিয়াবা পৰাজিত হৈছো। আৰু কেতিয়াবা জীৱনৰ সঞ্জীৱনী বিচাৰি দুগুণ উদ্যমেৰে পুনৰ আগবাঢ়িছোঁ। বর্তমানৰ জটিল তথা যান্ত্রিক জীৱনৰ অনাকাংশিত কর্মব্যস্ততাই কেতিয়াবা কাণে কাণে কৈ গৈছেহি সময়ৰ টিকনিডালৰ কথা। সময় গতিশীল। গতিশীলতাই সময়ৰ ধৰ্ম। বন্ধ হৈ যোৱা ঘড়ীৰ কাটাই জানো ধৰি ৰাখিব পাৰে সময়ক ? সময়ৰ বোকোচাত উঠিয়ে আজি আমি ২০১৯ৰ দুৱাৰডলিত। সুখময় হওঁক নৱবৰ্ষ সকলোৰে বাবে।
No comments:
Post a Comment