দুবাৰ জন্ম লোৱা ছোৱালীজনী

গৰ্ভধাৰণৰ ১৬ সপ্তাহ পিছত ২০১৬ চনৰ জানুৱাৰী মাহৰ কোনোবা এটা দিনত নিয়মানুসৰি চেক-আপ কৰাৰ বাবে স্বামীৰ সতে একেলগে চিকিৎসকৰ কাষ চাপিল মার্গাৰেট বোয়েমাৰ নামৰ মহিলা গৰাকী। চিকিৎসকে আল্ট্ৰাচাউণ্ড যন্ত্ৰৰ সহায়ত মার্গাৰেটৰ গৰ্ভস্থ সন্তানটিৰ বৃদ্ধি আৰু বিকাশৰ বিভিন্ন দশাসমূহ পুংখানুপুংখ ভাবে পৰ্যবেক্ষণ কৰিবলৈ আৰম্ভ কৰিলে।

স্থান আমেৰিকা যুক্তৰাষ্ট্ৰৰ টেক্সাচ চহৰ। মাৰ্গাৰেট আৰু তেওঁৰ স্বামীক ইতিমধ্যে জনাই দিয়া হৈছিল যে তেওঁলোক এগৰাকী কন্যা সন্তানৰ পিতৃ মাতৃ হ'ব। উল্ল্যেখযোগ্য যে আমেৰিকাত জন্মৰ আগেয়ে সন্তানৰ লিংগ নিৰূপন কৰাটো আইনৰ ফালৰ পৰা দোষণীয় নহয়। আমাৰ দেশত অৱশ্যে ১৯৯৪ চনৰ পৰা আইন মতে Pre-Conception and Pre-Natal Diagnosis এক দণ্ডনীয় অপৰাধ। যিয়েই নহওঁক বাৰু, পিতৃ মাতৃয়ে মৰমতে উপজিব লগা সন্তানৰ নাম ৰাখিলে "লিনলি"। তেওঁলোকৰ চকুত অযুত সপোন। শয়ণে সপোনে কেবল লিনলি আৰু লিনলি……

আল্ট্ৰাচাউণ্ড যন্ত্ৰৰ লগতে সংলগ্ন হৈ থকা মনিটৰত চিকিৎসকৰ লগতে মাৰ্গাৰেট আৰু তেওঁৰ স্বামীয়েও একেথৰে চাই ৰৈছে। মাৰ্গাৰেটৰ গৰ্ভত একলা দুকলাকৈ বাঢ়ি অহা লিনলিৰ সৰু সৰু হাত ভৰিবোৰৰ সঞ্চালন দেখি মাৰ্গাৰেট আৰু তেওঁৰ স্বামী পুলকিত হৈ পৰিছে। কিন্তু চিকিৎসকগৰাকী যে নিৰ্বিকাৰ ! মাৰ্গাৰেটে মন কৰিলে যে চিকিৎসকজন কিছু চিন্তিত, শংকিত ! 

: ᴡʜᴀᴛ ᴛʜᴇ ᴍᴀᴛᴛᴇʀ ɪs ᴅᴏᴄᴛᴏʀ ? -মাৰ্গাৰেটৰ প্ৰশ্ন।

: ᴅᴏɴ'ᴛ ᴡᴏʀʀʏ, ɴᴏᴛʜɪɴɢ sᴇʀɪᴏᴜs --ডাক্তৰৰ উত্তৰ।

যথাসময়ত আল্ট্ৰাচাউণ্ড শেষ হ'ল। চিকিৎসকজনে তেওঁলোকক কিছুপৰ বহিবলৈ দি আন এটি কোঠাত সোমাল। কিছুপৰ পিছত মাৰ্গাৰেট আৰু তেওঁৰ স্বামীক সেই কোঠাটোলৈ মাতি পঠিওৱা হ'ল। কোঠাটোত তিনিজনমান ডাক্তৰ একেলগে বহি আছিল। এজন ডাক্তৰে মাত লগালে --

: আপোনালোকক এটি গুৰুত্বপূৰ্ণ কাৰণত ইয়ালৈ মাতি আনিছোঁ। বহক, আমি কথা পাতো। 

মাৰ্গাৰেট আৰু তেওঁৰ স্বামী দুয়ো পৰস্পৰে পৰস্পৰৰ চকুলৈ চাই চকীত বহিল। আল্ট্ৰাচাউণ্ড কৰা চিকিৎসকজনে এইবাৰ মাৰ্গাৰেটলৈ চাই অনুচ্চ কণ্ঠেৰে মাত লগালে --

: ᴡᴇ ᴀʀᴇ ʀᴇᴀʟʟʏ sᴏʀʀʏ ᴛᴏ ɪɴғᴏʀᴍ ʏᴏᴜ ᴛʜᴀᴛ ᴛʜᴇ ᴄʜɪʟᴅ ʏᴏᴜ'ʀᴇ ᴄᴀʀʀʏɪɴɢ ʜᴀs ᴅᴇᴠᴇʟᴏᴘᴇᴅ sᴀᴄʀᴏ ᴄᴏᴄᴄʏɢᴇᴀʟ ᴛᴇʀᴀᴛᴏᴍᴀ... 

: ωнαт....!!! - মাৰ্গাৰেটে চিৎকাৰ কৰি উঠিল। 

: ɪᴛ ɪs ᴀ ʀᴀʀᴇ ᴛᴜᴍᴏʀ ᴛʜᴀᴛ ᴀᴘᴘᴇᴀʀᴇᴅ ᴀᴛ ᴛʜᴇ ʙᴀsᴇ ᴏғ ᴛʜᴇ ʙᴀʙʏ's ᴛᴀɪʟʙᴏɴᴇ. ʙᴜᴛ ᴅᴏɴ'ᴛ ᴡᴏʀʀʏ, ᴡᴇ ᴄᴀɴ sᴀᴠᴇ ʜᴇʀ. --ডাক্তৰে ক'লে।

মাৰ্গাৰেট আৰু তেওঁৰ স্বামীক ডাক্তৰৰ কথাত পতিয়ন যোৱা যেন নেলাগিল। হয়তো ডাক্তৰেও কথাটো বুজিব পাৰিছিল। তেওঁলোকে বুজাই দিলে যে লিনলিৰ টিউমাৰটো বেছি চিন্তা কৰিবলগীয়া কৈ ভয়াবহ হৈ উঠা নাই। তদুপৰি লিনলি এতিয়া মাথোন ১৬ সপ্তাহৰ এটি গৰ্ভস্থ শিশু। আমি ২১ সপ্তাহলৈ লিনলিক পৰ্যবেক্ষণ কৰিম। তাৰপিছতহে আমি এই টিউমাৰটোৰ কথা চিন্তা কৰিম। এতিয়া আপোনালোক নিচিন্ত মনে ঘৰলৈ যাব পাৰে। 

ডাক্তৰৰ পৰামৰ্শ অনুসৰি মাৰ্গাৰেট আৰু তেওঁৰ স্বামীয়ে ২১ সপ্তাহলৈ অপেক্ষা কৰি পুনৰ আল্ট্ৰাচাউণ্ডৰ বাবে গ'ল। আল্ট্ৰাচাউণ্ডৰ ৰিপোৰ্ট চাই ডাক্তৰে ক'লে -- 

: লিনলিৰ টিউমাৰটো ক্ৰমে ডাঙৰ হৈ আহিছে আৰু টিউমাৰটোৱে গৰ্ভস্থ শিশুটিৰ তেজ শোষণ কৰিবলৈ আৰম্ভ কৰিছে। তদুপৰি বাঢ়ি অহা টিউমাৰটোৱে লিনলিৰ হৃদযন্ত্ৰৰ ওপৰত চাপ দিয়া বাবে হৃদস্পন্দনো অনিয়মিত হৈ পৰিছে। এয়া শুভ লক্ষণ নহয়। অনতিপলমে গৰ্ভস্থ শিশুটিৰ অস্ত্ৰোপচাৰ নকৰিলে, শিশুটিৰ লগতে মাতৃৰ জীৱনৰ প্ৰতিও ভাবুকি আহিব। সেয়েহে আমি অনতিপলমে অস্ত্ৰোপচাৰ কৰিম। আপুনি সাজু হওঁক। 

এয়া এক ভয়ংকৰ কথা, অন্ততঃ মাৰ্গাৰেট আৰু তেওঁৰ স্বামীৰ বাবে। এই অস্ত্ৰোপচাৰত মাৰ্গাৰেটৰ লগতে গৰ্ভস্থ লিনলিৰো অস্ত্ৰোপচাৰ হ'ব। দুঃচিন্তা আৰু হতাশাই তেওঁলোক দুয়োজনকে বিচলিত কৰি তুলিলে।

২০১৬ চনৰ এপ্ৰিল মাহত অৰ্থাৎ গৰ্ভধাৰণৰ ২৩ সপ্তাহ ৫ দিনৰ দিনা মাৰ্গাৰেটক অপাৰেচন থিয়েটাৰলৈ নিয়া হ'ল। সকলোবোৰ থিক-থাক কৰি ১০জন চিকিৎসকৰ এটি দলে মাৰ্গাৰেটৰ উদৰৰ নিম্ন অংশটো কাটি ২৩ সপ্তাহৰ গৰ্ভস্থ ভ্ৰূণ লিনলিক মাতৃদেহৰ পৰা বাহিৰলৈ আনি লিনলিৰ টিউমাৰটো ৰাজহাড়ৰ নিম্নাংশৰ পৰা কাটি পৃথক কৰি পেলালে। প্ৰক্ৰিয়াটো আছিল অতি জটিল কিয়নো মাত্ৰ ২৩ সপ্তাহৰ ভ্ৰূণ এটি মাতৃ গৰ্ভৰ বাহিৰত জীৱিত অৱস্থাত ৰখাতো এটা অসম্ভৱ প্ৰায় কাম। তদুপৰি লিনলিৰ হৃদস্পন্দন আছিল অনিয়মিত। অস্ত্ৰোপচাৰৰ সময়ত এবাৰ লিনলিৰ হৃদস্পন্দন বন্ধ হোৱাৰ উপক্ৰম হৈছিল। কিন্তু চিকিৎসকৰ তৎপৰতাত যেনিবা হৃদযন্ত্ৰ বন্ধ হ'বলৈ নেপালে। 

প্ৰায় চাৰি ঘণ্টা যোৰা অস্ত্ৰোপচাৰটো সুকলমে সম্পন্ন কৰাৰ পিছত ২৩ সপ্তাহৰ ভ্ৰূণটো পুনৰ মাতৃ মাৰ্গাৰেটৰ গৰ্ভত স্থাপন কৰি টেক্সাচৰ চিকিৎসক সকলে এক অসম্ভৱ কাম সম্ভৱ কৰি তুলিলে। তাৰ থিক আঢ়ৈ মাহ পিছত, অৰ্থাৎ ২০১৬ চনৰ জুন মাহৰ ৬ তাৰিখে ৫ পাউণ্ড ওজনৰ লিনলিৰ জন্ম হয়। লিনলি আৰু তেওঁৰ মাতৃ দুয়ো বৰ্তমান সুস্থ। ২০১৬ চনৰ জুন মাহৰ ৬ তাৰিখে ওপজা লিনলিয়ে স্বাভাৱিক ভাবে জন্ম হোৱাৰ আগতেও অৰ্থাৎ ২০১৬ চনৰ এপ্ৰিল মাহত অস্ত্ৰোপচাৰৰ সময়ত প্ৰায় তিনি ঘণ্টা মাতৃ গৰ্ভৰ পৰা বাহিৰত থাকি পৃথিৱীৰ পোহৰৰ দেখা বাবে তেওঁক একেটা জীৱনতে দুবাৰকৈ জন্মগ্ৰহণ কৰা বিশ্বৰ প্ৰথম আৰু একমাত্ৰ মানুহ বুলি জনা যায়। লিনলিৰ পিতৃ মাতৃয়েও বছৰত দুবাৰকৈ জন্মদিন উদযাপন কৰে।সাম্প্ৰতিক সময়চোৱাত দুবছৰীয়া শিশু লিনলি নিসন্দেহে চিকিৎসা বিজ্ঞানৰ উত্তৰণৰ এটা উল্ল্যেখনীয় মাইলষ্টোন !

তলৰ লিংকটো চাব পাৰে :
https://youtu.be/uHgwij1hIF8